Nach em Brunch in Futige, sy mir uf Bärn. Dört hei mir im Altenberg uf myre Abteilig e Halt gmacht. Eini vo myne Patientinne het e so Fröid gha, dass ig i ihrer Heimat ghürate ha u si het döfe cho spalliere. Si het us lutter Fröid es Schlägli gha. I ha mi no vo ihre verabschiedet.
D'Tavapan wo der Kurt denn gschaffet het, isch a der Boumäss in Basel verträtte gsy. Da mir no nid sy ghürate gsy, han ig im Früehlig 1987 a ihrem Stand e Wettbewärb dörfe mache u ha der erscht Prys gwunne: Vier Täg Paris für zwöi Persone. Das isch du grad üsi Hochzytsreis gsy. Der Kurt u ig sy am Namittag, mit em TGW uf Paris. Es isch scho ne wunderschöni Stadt! Obwohl s'nid am Meer liegt, hei mir ganz viel Meeresfrücht ggässe. Daaas isch feeeiiin gsy! Mir hei e Tageskarte gha für alli Büsse, Tram u Metro u hei das voll usgnützt. S'Hotel isch z'Mitts ir Stadt gsy, ir Nächi vom TGW Bahnhof.
Wo mir sy zrügg cho, isch myni Patientin gstorbe gsy. Es het mi tröschtet z'wüsse, dass si no di grossi Fröid het gha a üsem Hochzyt dörfe Spallier z'stah(im Rollstuehl).
Im Läbe sy Fröid u Leid haut scho hüfig nach zäme.
S'Bild isch us em Pixabay, Danke!