Nach vier Jahr Fründschaft u zwöi Jahr verlobt sy, hei mir üses Hochzyt ändlech gfyyret. Planet hei mir's scho laaang...ömu ig...
Wo mir zum Byspiel es Jahr im Vorus sy go d'Kirche Frutigen reserviere, het der Pfarrer nid chönne gloube, dass mir zwöi Freaks vor "Gemeinde Für Urchristentum" sölle sy. E so het üsi Kirche denn gheisse u in Frutigen isch es denn eher e konservativi Gruppierig gsy.
Mir hei der Troupfarrer sälber mitgnoh. Das isch der Bernhard Steiner gsy. E damalig guete Fründ vo üs.
Da mir beidi e grosse Fründeskreis hei gha u der Kurt us em Glarnerland cho isch, hei mir e grossi Kirche bruucht u e Möglechkeit zum Übernachte. Mir hei für das s'Künzisteg reserviert gha. Sälber hei mir im Hotel Adler wo's Fescht am Abe stattgfunde het übernachtet. Am Sunndig hei mir mit dene wo übernachtet hei no brunchet u sy nächär uf ne kurzi Hochzytsreis.
Es sy fei e chly Lüt ir Kirche gsy u zum Apéro sy mir alli a Blausee. Dört hei mir oppe 130 Ytritte zahlt. D'Jugi vo Glarus het im ne Understand näb em Restaurant es supperschöns Büffet gserviert u mir hei am Restaurant eifach Zapfegäld zahlt.
Es het vor üs es Hochzyt gha. Wo die us der Kirche sy, het das abegschüttet. Wo mir zur Kirche sy, het kurz d'Sunne gschune. Wo mir dynne si gsy, hets ume grägnet bis üsi Spallierer cho sy. Vo denn aa het d'Sunne gschune bis mir am Abe im Adler zum Tisch sy. Am Abe sy de 85 Lüt yglade gsy. Mir hei es wunderschöns Fest gha, vo zwöi liebe Fründe organisiert. Es isch sooo schad, dass mir nüm so Kontakt hei, da die zwöi beidi mit ihrne Familie im Glarnerland wohne...
Das Fescht blybt unvergässlech!