Scho am Samstigabe het my Schatz die Rindsrippe übertah, uf 50 Grad. Es het usgseh wi ne Flügu vom ne Flugsaurier...Rindssparripps...Mir hei wieder feins Rindfleisch diräkt ab Hof gkouft. Byr letschte Bstellig het der Kurt äbe so nes grosses Stück wo süsch aube aus Suppefleisch gkochet wird, für Pulledbeef lah schnide. Är het megaviel Gwürz drah tah u immer wieder dry gstoche u mit em ne Löffu abghulfe, dass s'Fleisch füecht blybt. Es het natürlech dämentsprächend gschmöckt. I ha gmeint är sygi id'Heizig abe u ha gar nid gfragt, wär's isch wo's am Abe no glütte het. Jetz isch das die liebi Burefrou, üsi Fleischlieferantin gsy wo üs e megaschöne Zopf u Eier bracht het. Si het üs eifach wöue e Fröid mache u das isch ihre würklech glunge! Mir hei nämlech gar ke Brot gha...u so ne feini Züpfe isch natürlech viiiu besser! O si isch erstuunt gsy ab däm Bitz Fleisch im Ofe wo vor sech häre brutzlet het.
Am Sunndigmorge han ig z'ersch grad no mit eire vo myne Gurus telefoniert u nächär bin ig per WhatsApp Call im Gottesdienst gsy. Der Martin Bühlmann, Leiter vo de https://de.wikipedia.org/wiki/Vineyard im Dütschsprachige Ruum het üs wieder einisch ermuetiget. Er chunnt öppe einisch im Jahr uf Konolfingen i üsi Kirche cho rede. Syni Frou isch drum hie ufgwachse u syni Schwiegereltere sy bis zu ihrem Tod bi üs Mitglieder gsy. Syni Muetter het o hie gwohnt.
Kurz nach em Mittag sy der Stephan u der Aiden mit em Velo hie härecho. I ha e Tag wi s'Wätter gha, am liebschte im Bett...
Der Aiden het no mit em Poppeli (e so nenne üsi Änkle der Kurt) es Füürli wölle mache, drum isch der Stephan mit em Outo der Räschte vor Familie go hole. Zwüsche de Rägegüss, hei si dusse Chai-Latte, Öpfle u Prussiens uf em Füür gwärmt u gvesperet. I ha mi ufgraffet u bi o use, h'as öppe zwänzg Minute usghalte. Es isch mir z'rouchig u z'Kalt gsy...Wo's du wieder richtig grägnet het, sy du alli yne cho. Gäge Abe sy der P. u d'R. uf Bsuech cho. Thürs hei se no grüesst u sy du Hei. Es isch e ganz e schöne lockere Abe gsy. Vom viele Schmöcke, han ig fasch ke Fleisch möge ässe. Uf em Bild isch no der Räschte...I ha gly Mal ir Stube uf der Massageliegi Platz gnoh u ha's bis spät gnosse bi de Lüt z'sy.