Hüt han ig am Elfi e Termin byr Schmärzärztin gha. Si het mir es Mittu verschrybe wo's mir weniger schlächt wird. I bi froh, geit's mir mit dene Mittu guet. I ha Hüt erfahre, dass si e Studie gmacht hei wo si Lüt mit Schmärze hei la fahre u anderi mit Opiate. Die mit de Opiate syge besser gfahre. Drum sy si zueglah u drum darf ig o, wenn ig mi guet füehle ume Outo fahre.
Am Mittag bin ig i d'Pizzeria Hofguet mit ere Fründin go Zmittag ässe. Es het e Boustell gha, drum han ig bym Hiiwäg länger gha. Bym Rückwäg han ig en anderi Route gno.
Am zwöi han ig bym Onkolog e Termin gha. I ha scho ume chly abgnoh aber i ha no gnueg Resärve...
D'Pflegefachfrou het mir Tempi u der Bluetdruck gmässe. Der Dr. het mi du gholt. Er het mir der Vorschlag gmacht gha ume e Hormontherapie z'mache. I ha mi dergäge entschiede, da ig a Händ u Füess immer no Sensibilitätsstörige ha und ig nid wi byr letschte Hormontherapie söfu Schmärze i de Händ u Fuessglänk wott. Der Dr. het sofort gseit, das sygi verständlech u är respektieri mi Entscheid. Myni Bluetwärte syge ja scho vor zwöi Wuche guet gsy, sogar myni Bluetarmuet sygi nüm da. Är findi es sygi sehr guet, wi's mir göngi u wöll mi erscht im ne Monet wieder gseh. I wüssi ja, dass ig zu jeder Zyt chöng ir Onkologieabteilig aalütte, wenn öppis nid guet sygi. I danke für alli Gebät!
D'Räschte vom Zmittag sy no zum Znacht guet...