Es isch spannend gsy bi den alte Lüt z'schaffe.
I deren Abteilig won ig im erste Praktikum bi gsy hei mir e Maa gha wo nümm het chönne rede. Dä glych Maa het aber chönne i de schönschte Tön singe u flueche. I ha ganz hüfig mit ihm gsunge, de isch er glücklech gsy. I ha ghört säge, dass o s'Bätte vom glyche Hirnsektor gstüret wärdi.
Uf der glyche Abteilig isch en alti Diakonissin im Stärbe gläge. I ha plötzlech der Ydruck gha, i söll zu ihre yne u s'Lied "so nimm denn meine Hände..." singe. Byr letschte Strophe sy ihre Träne abegrugelet u won ig fertig bi gsy het si der letscht Huuch vo sich gäh. Es isch ergryfend gsy, dä Friede i däm Zimmer!
Der Kurt u ig hei während mym erschte Praktikum ghürate. Mir hei das planet gha won ig no nid im Altenberg bi gsy. I ha zwüschem Zivilhochzyt und em Kirchleche nün Täg anenand gschaffet damit ig nach em Hochzyt vier Täg frei ha gha. Es het üs mega gfröit, dass myni Abteilig isch cho Spalier stah...