Vo Thun uus isch das gäbig gsy, in Steffisburg z'schaffe. I bi als Praktikantin aagstellt gsy. Di andere hei gwüsst, dass ig o scho viel Erfahrig ha. I verschiedene Situatione bin ig sogar gfragt worde, was ig würd mache und mängisch han ig's o eifach gseit.
Einisch hei mir es alts Froueli gha wo het wölle stärbe. Si het beschlosse gha nümme z'ässe. I ha gfunde, das müess me respektiere. Myni Vorgsetzti het's anders gseh. Si het entschiede, dass si ihre e Magesonde wöu stecke um se künstlech z'ernähre. I ha ihre abgrate aber si het das beschlosse gha. I ha müesse assistiere. Das isch schrecklech gsy. Di Frou het Ösophagus varize gha, das sy Krampfadere i der Spysröhre. Chöit nech di Souerei vorstelle wo's gäh het wo d'Sonde dry gstochen isch worde...
S'Froueli isch du grad a däm Tag gstorbe.