I dere Zyt won ig dört ha gschaffet bin ig uf mehreren Abteilige gsy. Uf der Ufnahm het's mi am spannendschte tüecht. Dört han ig es paar Mal Modis gha wo lieber bi üs si gsy als dört wo si gwohnt hei. Da isch mir vorgworfe worde, ig machi Bumerang Patiänte... I ha nächär no uf der Psycho-Geriatrie gschaffet. Plötzlech bin ig is Büro vom Pflegedienstleiter zittiert worde. Herr S. isch mir guet gsinnt gsy. Het mir erklärt, dass wenn ig wyter zu dene Konditione ir Psychi tüeg schaffe, wärdi ig nume usgnützt. I heigi da Kompetänze won ig niene meh wärdi ha, wenn ig nid en Usbildig machi. Ig söll doch uf Bärn i Altenberg wenigstens go Krankepflegerin FASRK lerne. I söll aber z'ersch no es halbs Jahr i nes Altersheim go schaffe u chly Distanz vo Münsige schaffe. I merki de, öb's mir o gfalli...I ha du d'Prüefig für i Altenberg gschafft u bi für nes halbs Jahr is Asyl Gottesgnad uf Steffisburg go schaffe.