I ha hüt am Morge am viertu ab Nüni ir Onkologie müesse sy. D'Pflegefachfrou het mir der PICC gspüehlt. Dä het aber nüt wölle füregäh. Si het mi süsch müesse stäche für d'Bluetentnahm. E Zwöiti het müesse cho für ar Hand e Leitig chönne z'lege. Nächär hei mir s'Resultat müesse abwarte.
Der Kurt isch mitcho zum Onkolog. Dä het üs zum CT gseit, was sichtbar isch u was nüm. Die Fläcke ir Lunge würdi är nid grad als Tumore bezeichne. Es chönnti o e Reaktion uf d'Bestrahlig sy oder vo re Entzündig. Ir Läbere gsäch me nüt me. NÜT MEH! I de Chnoche het's scho no Matastase, aber es isch nid wyter gange. Der Tumormarker isch wyter abe. D'Usschläg a de Underarme sy besser worde, es isch klar vor Therapie gsy. Es isch guet gsy hei mir abbroche. Är chönni üs ke Prognose gäh. Es sygi halt e Chronischi Krankheit wo nid heilbar syg aber es gäbi no gnueg Therapiemöglechkeite, we's de wieder chömm. Mir heige dä Kräbs jetz chönne mit dere Therapie zrüggdränge.
Der PICC isch usezoge worde. Das het nüt weh tah. I ha du 10 Minute müesse druf drücke. I ha nächär e Druckverband druf übercho wo 24 Stund druf blybt. I bi jetz frei für id Ferie. Kei Leitig me...
PRAISE THE LORD!