Es isch zu dere Zyt gsy won ig ume in Thun gwohnt ha u no in Münsige gschaffet ha. I ha mit em ne Arbeitskolleg der Töff tuuschet gha. Syne isch e Yamaha DT gsy, o ne Enduro eifach e chly höcher als der Honda vom Kurt won ig süsch gfahre bi. I bi zwüsche Wichtrach u Münsinge mit em ne Hunderter derhär cho.(denn het me no Usserorts so schnäll dörfe fahre) Öppe 600 Meter vor der USM Krützig (Hüt isch dört e Kreisel) isch es Groseli mit em ne Töffli ungerwägs gsy. Es isch ihre i Sinn cho, dass si änet der Strass sött go schaffe. Da het si, ohni Handzeiche überegha(i wär doch süsch sicher Rächts a ihre verby...) I ha gmeint, si machi nume ne Schwänker aber si het mir eigetlech der Wäg abgschnitte. I bi unbrämset voll mit em Bei a ihres Pedal. Es het si dervo gspickt und i bi unger Töff u Töffli Quer über myni u di linki Fahrbahn grütscht. Gott sei Dank isch grad kene entgägecho. I wär süsch drunger...I bi am linke Strasserand blybe liege. Es isch gly druf abe es Outo cho u der Fahrer het mir beidi Gfährt ab em rächt Bei gno. I ha sofort zum Groseli wöue go luege, was es ihre gmacht het. Si het ke elm anne gha u isch ufs Gsicht gheit. Si het usgseh wi der Rocki nach em ne Boxkampf. Der Polizist wo später cho isch het mir nid gloubt, dass ig sövu schnäll derhär cho sygi. I heigi nid meh als e Drissger druf gha, süsch gsäche mir beidi andersch uus. I ha du gseit, i heigi e Schutzängel. Der Polizist het du gmeint, nei, es ganzes Heer! Mir hei beidi nume siebe Stiche müesse nähie, si im Gsicht u ig am Bei. So sy mir o scho baud wieder zwäg gsy.