I ha am Kurt sy Töff grad bi mir bhalte bis ig d'Prüefig gmacht ha...Kurt isch ir RS gsy...
Zur glyche Zyt han ig o grad glernt Outofahre. Es isch bi Beidem der glych Fahrlehrer gsy. Mängische het är mir im Outo gseit: "Frou Spörri, tüet nid so Kurve schnyde. Dir syt nid uf em Töff!" Er het mir o öppedie müesse säge i söll nid so schnäll fahre.
Myni Töffprüefig isch so gange: I bi am Viertu vor Füfi am Abe in Thun am alten Ort vom Stasseverkehrsamt häregfahre. Der Experte het mi gfragt, was ig brueflech machi. I han ihm gseit, i sygi ir Lehr zur Psychiatriekrankeschwöschter. Es isch no e Maa dört gsy wo o d'Prüefig het gmacht.
Der Experte het gmeint, der Maa söll vorabfahre u ig ihm nachefahre är tüeg üs de säge, wenn tuusche.
Mir sy also vom Lache här gäge Schadou u übere Bahnhofplatz zum Muulbeerikreisu über d'Aarestrass Richtig Kasärne, dört han ig füre müesse u der Maa hindere. I ha d'Allmend füre müesse bis zur Ample wo's i 60-Er Richtig Oberland Migros u nächär dür s'Quartier zrügg zum Strasseverkehrsamt. Das Ganze isch 5 bis 7 Minute gange...I chönni s'L wägnäh...
Byr Outoprüefig het's grad früsch gschneit gha u me het am Achti keni Parkplätz gseh...I ha nume hingerzi müesse yneparkiere. My Fahrlehrer het mi uf verschiedeni Fallene vorbereitet gha. Bym einte Strässli hets es Stoppschild gha wo i de Strüücher versteckt isch gsy. Obwohl ke Stopp uf der Strass sichtbar isch gsy, han ig aaghalte. Der Experte het gfragt, öb ig di Strecki kenni. E chly später han ig hinderzy über ne Krüzig müesse. Statt i d'Mitti vor Strass z'fahre, han ig e chly meh Gas ggäh u bi am Rand chly über ne Schneehuufe. Der Experte het gmeint, der Fahrlehrer heig de nid so Fröid a mir, wie ig mit sym Outo umgöng. I ha du gmeint, är hätti sicher no weniger Fröid wenn ig meh id'Mitti wär u mir eine drygfahre wär...I ha ömu bestande!