I ha frei gha u bi mit ere Migräne im Bett gläge...i ha fasch jede Monet, bym Eisprung e starchi Migräne gha...
-Plötzlech tschäderet mys Telefon. Am anderen Ändi isch my Brüetsch. Dä isch im letschte Jahr uf Kamerun id Mission, drum glouben ig's z'erscht gar nid. Är betüüret, dass es ihn sygi u, dass är s'fescht Längizitti nach sym Schatz heigi. Är wöu hürate u gly ume uf Kamerun. Es isch im Ougust gsy. Und ig han ihm gseit, dass wenn ig söu Brutfüehrere sy, es nid vor em Novämber ghürate wärdi. I ha du organisiert u si hei am 23. Novämber 1985 ghürate u sy e Wuche druf abe zäme usgreist.