I verzelle hie was us myre Sicht denn passiert isch: E Jungi Frou isch immer brav gsy u het sech ganz nach em Wille u zur Fröid vo ihrne Eltere bis Ändi Gymer entwicklet. Si het no nid gwüsst i weli Richtig go studiere u hät gärn d'Wäut gseh u so isch si uf ne Wäutreis. Uf ere färne Insle, het si sich i ne junge Maa vo dört verliebt. I dere Zyt isch hie ir Schwyz ihre Papa gstorbe. Si isch zrüggcho a d'Beärdigung u het der Muetter erklärt, dass si ihres Erb wöu u uf di färni Insle wöu zieh. Ihri Muetter het ir Verzwyflig am ne befründete Arzt aaglüttet u gseit, dass ihri Tochter düredräit sygi, furt wöu u plötzlech nümm wöu studiere. Dä het nüt bessers gwüsst als se dür d'Polizei mit em ne FFE (fürsorgleche Freiheitsentzug) i d'Psychi uf Münsige yz'wyse. Si het sech natürlech mit Häng u Füess gwehrt u het sogar e Polizist bisse. I bi bym Ytritt derby gsy u ha ihri Gschicht ghört u mi gweigeret ihre e Sprütze z'gäh mit starchem Mittu wo se total versänkt het. Es het's du öpper anders gmacht. Si isch immer wieder verlade worde. I ha immer wieder mit ihre gredt. Gly isch ihre Fründ cho. Dä het zu ihre dörfe u ig ha o mit ihm gredt, zwar nid uf Dütsch. Nach paar Wuche het si sech beruhigt gha u het o bi de Therapie mitgmacht.
I ha dä Dienst gha, wo mir mit de Lüt hei use dörfe go loufe. I ha si u ihre Fründ mitgnoh u ha mi nid abgsicheret gha, öb si use darf... Mir sy z'sächste höch id Windrose eis go zieh. Das isch es Outobahnraststätte gsy ir Region. Wo mir fertig gkäfelet hei, han ig scho gmerkt, dass si mit ihrem Fründ gestikuliert. I ha du zum Heigah ufgrüeft. Wo mir use sy, isch si plötzlech richtig Outobahn dervo gsecklet. I ha ihrem Fründ zuegrüeft se lah z'gah u ihm befohle se vo wytem z'beobacht. I göng mit den andere Froue Hei u chöm de nächär zrügg. Mir sy scho e guete Biz gloffe gsy won ig merke, dass di Zwöi üs nacheloufe. I ha mi gkehrt u bi ihre entgägegsprunge u ha se Umarmt. Si het mir du gseit: "won ig bir Outobahn der Duume usetah ha für dervo z'gah isch mir plötzlech bewusst worde, dass Du chönntisch Schwierigkeite übercho. Drum han ig dänkt, es sygi gschyder, wenn ig umkehri. Es wärdi öppe scho ne Wäg gäh us myre Lag."
I ha vo allne s'Verspräche abgnoh, niemerem vo däm Vorfall z'verzelle...
Uf em Heiwäg isch plötzlech e fröhlechi Stimmig gsy. I ha di ganz Zyt innerlech bättet...
Won ig am Morge zum Rapport cho bi, het's gheisse di jungi Frou sygi sehr unruhig gsy ir Nacht, öb me ihri Medi ume söu erhöhe. I bi ufgstande u ha gseit, i müessi mit ihre go rede. I wüssi öppis vo Gester. I bi zu ihre u ha ihre erklärt, dass wenn ig öppis sägi si vielecht schnäller Hei chöng u wenn ig nüt sägi, tüege si d'Medis erhöhe. Si het du gmeint: "redt..."I ha di ganzi Gschicht vom Vortag verzellt inklusive ihrem zrüggcho u was se derzue bewoge het...D'Stationsärztin het du gmeint: "Di Frou isch nid Krank, mir müesse sofort zrügg mit de Medis." So isch es cho, dass innert drü Wuche di Frou d'Abteilig verlah het. I ha Mau ghört säge, si sygi usgwanderet...