Der P. isch Hüt zum R. Der M@i het üs gfahre. Uf em Wäg uf Burgdorf hei mir ihn abglade. Nach der Bluetentnahm bin ig zum Onkolog. Er het mi gfragt, wie's mir göng. I ha ihm gseit, dass näbst de Sensibilitätsstörig i Händ u Füess jetz mys Gsicht o aaföng sech komisch aaz'füehle. U wi uf em Fötteli sichtbar, tüeg sech der Usschlag a de Händ jetz no uf d'Ungerarme usgwittet. Am Gsicht tüecht mi, dass es o geng wi schlimmer wird mit myne Fläcke... Myni linki Syte tuet mir geng no weh u zwüschyne han ig so wi Krämpf uf der rächte Syte vom Buuch. I heigi z'Gfüehl, es chönnti d'Läbere sy. I ha ihm du gseit, i sygi Hüt chly e Jammeri. Är het du gmeint, das sygi nid Jammere. Was ig sägi sygi alles nachvollziehbar u ersichtlech. Es sygi klar, dass mir bi dene Umständ d'Therapie abbrächi. Am Mändignami han ig es CT zum luege, wie sech z'ganze entwicklet het. Am Donnstig gahn ig ume zum Onkolog go bespräche u wenn alles uf guete Wäge isch, de zieh si mir der PICC use. Der David het mi Hei gholt.
Am Nami han ig mit em Radio Onkolog vor Insle es Telefon gha. Dä het mir gseit, dass vorläufig d'Bestrahlig abgschlosse syg. I ha ihm gseit, dass sech myni Hut verfärbt het a dene Stelle wo si bestrahlt hei. Es sygi normal u wärdi mit der Zyt ume besser. I söll guet zu de Narbe luege. Was bis jetz nid ufgange sygi, blybi zue...Da bin ig scho no froh!!!
Mit der Schmärzärztin han ig Morn am 09.30 Uhr e Telefon Termin.