Im 1985 han ig d'Lehr aus Psychiatrieschwöschter aagfange. Für e chly meh als eis Jahr han ig mit der E. ir Löwenmatte e Wohnig gha. Mir sy zäme ir Klass gsy. Uf em Fötteli sy mir i de Ferie no mit em B. u sym Outo in St.Raphael, a der Côte d'Azzur. Mir hei denn Ferie gha, we niemer süsch Ferie het...
Es isch e spezielli Zyt gsy u d'Lehr isch für mi byr Zwüscheprüefig z'Änd gange. I ha mi Platz ir Klass nid würklech gfunde u ha no am Schuelleiter am ne Klasseweekend, e Korb ggäh gha... I ha mi uf der Ufnahm Abteilig für Lüt wo agressiv sy, einisch gweigeret gha öpper "z'versänke" u es anders Mal mit ere junge Frou bättet gha...Myni Note vo Schuel u Praktikum sy guet gsy u das het nüt gnützt. Ig ha aber gwüsst, dass wenn ig der Schuel nid passt, de flügen ig spätestens denn...Ar Prüefig isch vieles mündlech abgfragt worde, mit Schuleinterne Experte...
Uf der Abteilig hei si mi gärn zu de glyche Konditione bhaltet. I ha alles dörfe, inklusive Medi Richte u Verteile u Sprütze verabreiche, sogar i Muskel...Nach ere gwüsse Zyt, het mi du der Pflegedienstleiter is Büro zitiert u het mir as Härz gleit, no es halbs Jahr im ne Altersheim go z'schaffe u nächär d'Lehr als Krankenpflegerin FaSRK z'absolviere. Är het gmeint, i söll mi doch im Altenberg bi de Diakonisse in Bärn mälde. Das würdi mir eher entspräche, är würdi mir es Empfähligschrybe mitgäh. Wenn ig ir Klinik blybi, de heig 'ig später Mau, ohni Lehr: abgsageti Hose...u das fänd är schad!