Am 06.10 Uhr isch der Stephan mit mir vor em Schaffe cho öppis trinke. Er isch ume gange bevor mir zum Zmorge sy. D'Sarah het feini Züpfe vo Freudigers bracht. R. u H. hei d'Nacht i ihrem gmietete Büssli uf üsem Parkplatz verbracht. Mir hei öppis nach de Achte zäme zmörgelet. Am Nüni isch d'Frau N. vom MPD cho. Mir hei letzt Mal zäme e Pflegeplan erstellt. I bi sehr gspannt, wi sich myni Situation entwicklet...
R. u H. hei sech o verabschiedet u sy ume Hei. Der Kurt u d'Sarah hei übere Mittag no chly länger gschaffet. Nach ere kurze Siesta sy der Kurt u ig mit üsem Copen go nes Fährtli mache. Mir sy am Abe yglade gsy zum Geburtstag vom A. In Affoltere het's näb der Schoukäserei e ganz e gueti Bäckerei. Mir hei eigetlech e grosse Nussgipfu wölle poste. Si hei leider kene meh gha. Es het aber süsch leckeri Sache gha. I bi beid Wäg gfahre...
Daheime bin ig ume go liege.
Uf di Siebne sy mir du ufbroche zm Geburiässe. Es isch wieder einisch schön gsy . Si hei drü Paar yglade gha u ihri Tochter het ghulfe mit Drinks mischle, choche u serviere. Es isch mega fein gsy! Es isch e ganz e bsunderen Abe gsy mit viel Lache aber o mit Träne. I ha zwöi Lieder chönne singe. I ha würklech syt myre schwäre Lungenentzündig vo letzt Jahr im Januar, nüm richtig chönne singe...es het mi sälber berüehrt, dass es ume geit.
Hüt am Morge isch der David mit de zwöi Schätzlis da gsy. Si sy chly verchäutet mit Negativ Test...
Zum Zmittah het der Kurt e feini Habersuppe gmacht.
I ha Hüt scho zwöi Telefon gha vo Lüt wo my Bricht ir Regio-Zyttig "Hope Emmental" gläse u mys Interview glost hei.