Gester am 09.15 Uhr han ig müesse ir Onkologie sy. Der Kurt het mi häretah u isch hurti uf Lyssach go liefere. I bi am 09.35 Uhr scho vom Arzt grüeft worde. Der Kurt het o wölle derby sy. Er isch chly später derzuegstosse. Vor zwöi Wuche isch der Tumormarker gstiege gsy, drum bin ig nid sicher gsy öb ig wyter Chemo wott, we's nid besser isch. Mir hei der Marker ume lah bestimme. Er isch jetz doch am abnäh, was heisst, dass d'Chemo aagschlage het. Syt paar Wuche han ig a Händ u Füess immer meh Sensibilitätsstörige. I ha du e schwächeri Chemo übercho u no grad s'Knochestärchigsmittu.
Am Nami han ig ume gschlafe u gäge Abe sy R. u H. cho. I ha sogar möge ässe: es feins Mostfondue vom Bigle Chäsilade. Es isch feiiin gsy! Am Zähni sy mir alli müed is Bett gheit.