Mit sym Töff über d'Päss y isch er zum Zmittag cho. I bi ganz kribbelig gsy. I ha no am Mamie gseit, es sygi no nüt, er syg no nid my Fründ. Si het gmeint:" luege mir doch wenn er de da isch..."
Er isch cho, mit ere Glarne Pastete, glarner Birebrot u no Läderachschoggi...S'Mamie het mir du ir Chuchi gseit: "das isch e Flotte Bursch u dä het öppis im Sinn!"
Si het ne nach em Zmittag grad id Stube gschickt, är söll bi re kaputte Kommode luege, är sygi ja Schryner. Er het grad kurz vorhär als beste Schryner vom Kanton d'Lehr abgschlosse gha.
Nachdäm d'Schublade ume gangen isch, het är mi gfragt öb mir wölle es Töfftüürli mache. I bi natürlech Füür u Flamme gsy. I weiss no genau wo mir düresy: über Uetendorf, Riggisbärg uf Wislisau is Lamm. Syni Cousine het's denn gfüehrt. Dört hei mir öppis trunke u sy ume gäge Thun zue. Är isch nächär hurti go sys Lager bezieh bi sym Vater u isch am Abe mit mir id Jugi vor GFU (hüt BPlus) Thun cho. Mir sy nid lang blybe u sy a d'Aare go spaziere. Syt denn het's am ne Pfyler vom gdeckte Holzbrüggli hinger em Hotel Freienhof, es Härzli mit "K+Ch" drynne. Das isch am 24. September 1983 gsy.