Hüt am Mittag hei mir gnueg Räschte gha für alli wo da hei ggässe. My Schatz het no vom schöne Wätter profitiert u isch am Nami mit syre Schwöschter u am Schwager go skifahre. Er chunnt de Hinecht ume Hei.
Scho syt einigi Tage han ig es plöds Klopfe im rächten Ohr. I ha Hüt am Husarzt aaglütte u ha am viertu ab Drü grad härechönne. Myni Sarah het mi häregfahre. Der Dokter het sech z'ersch la "update". I ha ihm nächär das vom Ohr verzellt. Bym Yneluege isch e chly Schmalz im Wäg gsy, sodass me s'Trommufäll nid guet gseh het. Er het mir s'Ohr usgspüehlt. Bym dritte Mal isch e chlyne Pfropfe use u de isch es schön sichtbar gsy: es het es chlyses Loch bym Trommufäll. Das het mi öppe gstört...