I ha es paar Fründschafte u doch nüt ärnsts hinger mir gha u ha gseit, i göng öppe is Kloster. Aber e so han ig's nid gmeint gha...Scho am zwöite Tag hei mir als Team z'zwöit dür Mollis, vo Tür zu Tür müesse. Überall hei si üs d'Türe vor der Nase zuegschletzt. D'Lüt hei eifach nid wölle mitmache u myni Motivation isch uf under null gsunke. Es het doch paar jungi Lüt gha wo cho sy. Eine het bsunders Beduure gha mit üs. Er isch jeden Abe cho u het üs als Team mit Gmües us em Garte, Nöie Teesorte für im Teezält u Schoggi belieferet. Mit em ne rote Töff isch er aube cho. D'M. wo mit mir im Wohnwage ghuset het isch e chly schüüch gsy. Si het mir der Uftrag ggäh am Abe im Teezält dä jung Maa chly usz'quetsche. Si het sech nid gwagt ihn aaz'spräche. I ha ihre de müesse alles verzelle.
I ha sogar dörfe migah, mit em Töff u ha sälber probiert z'fahre. Am Wuchenändi bin ig total hässig gsy. Di ganzi Jugendgruppe vo Glarus isch a nes Openair, Windonissa. I wär doch sooo gärn mitgange. Es het gheisse, es bruuchi jedes vom Team im Zält. Es isch es Konzärt gsy vo "Schwert und Schild". Die Musigg het mir gar nid passt. Das isch Tanzmusigg mit Christleche Texte gsy...Dä jung Maa isch myni Rettig gsy. Er het mir es paar Kasettli bracht mit christlecher Rockmusigg: Resurection Band, Larry Norman, Petra. I bi auso a däm Samstigabe z'hindersch im Zält ghocket u ha der Walkmaan ufgsetzt gha...I bi voll am pubertiere gsy...
Am Sunndig druf sy 16 jungi Lüt im Klöntalersee touft worde. Unger ihne isch dä jung Maa gsy: der Kurt. Das isch es Fötteli vo ihm...