Das han ig scho immer wölle, e Summer lang mit der Zältkirche ungerwägs z'sy. Für das hei mir üs ei wuche in Frutigen vorbereitet u dört das ganze Material zwäggmacht. I dere Wuche han ig vernoh, dass ig d'Verantwortig ha für d'Musig. Es isch mir plötzlech bewusst worde, dass mir äuä nid a jedem Ort es Klavier würde ha. I ha mir also mit em Gäld won ig ir Migros verdient ha, e Gitarre gkouft u ha innert zwöi Wuche jedes Lied dermit chönne begleite. Uf de Bilder gseht me d'Zältkirche u s'Team vom Summer 1983. Mir sy all zwöi Wuche wyterzoge u hei jedesmal d'Zältkirche, es Teezält, s'Chuchizält, es paar Zält für einigi vom Team u e Wohnwage züglet. Mir sy mängisch vo Teams vor Ort ungerstützt worde u mängisch vo einzelne Persone. Es isch fasch e chly wi bym Zirkus gsy. S'Zältteam het das ganze Züg ufgstellt u de sy mir dür e Tag, je nach Ort, de Buure go hälfe oder Lüt für am Abe go ylade. Mängisch hei mir o müesse vo Tür zu Tür e Meinigsumfrag go usfülle. Das han ig gar nid gärn gmacht. Mängisch hei mir am Namittag es Kinderprogramm gha u jeden Abe isch öppis gloffe. Syg's e Film, es Konzärt u meistens no en Input. Nach em Abeprogramm isch me is Teezält u het dört bym ne Tee mit de Lüt diskutiert.