Wo mir zrüggcho sy vo Kamerun, het mys Mamie ihre Papa zu üs gnoh. Er isch am liebschte nach em Zmorge i Bus gstiege u ir Stadt umegfahre u mängisch isch er z'Bümpliz glandet u het sech nümme z'rächt gfunde. Er het im Poschettli üsi Adrässe gha u öppedie het ihn öpper Hei begleitet oder de hei si aaglütte. Mit sym "vergässe" isch es scho geng wi schlimmer worde...Einisch het ihm s'Mamie es Bad zwäggmacht gha. Es het se tüecht är schmöcki eifach nid früsch. Si het dranne zwyflet, dass är würklech badet. Drum het si der Papi ynegschickt. Dä het ihn verwütscht...Er isch aagleit am Badrand ghocket u het sy Strähl so im Wasser gschwänkt, dass me het chönne meine er badi. Mit em nasse Strähl isch är is Haar gstryche, was meh zum stinke als zum schmöcke bytreit het... Der Papi het ihm du is Wasser ghulfe u het ihm der Rügge gwäsche.
Wo der Grandpapa het afa ir Nacht ufstah u sech aalege, het s'Mamie ihm der Kleiderschrank pschlosse. Er het also no d'Schublade gha mit syre Underwösch. Eines Nachts het är i de längen Unterhose use wölle. Er het es zwöits Paar übere kopf gstülpt gha...Zum Glück het s'Mamie e liechte Schlaf gha u het ihn chönne derzue bewege wieder is Bett z'gah. Ab und zue het är mys Mamie gfragt, wo ihri gmeinsame Kinder syge. Si het ihm du gseit, dass si sy Meitschi sygi. Das het nümme so yne wölle.
Wo mir als Familie id Ferie sy, hei mir ihn in Bümpliz i nes Altersheim is Feriezimmer chönne gäh. Wo mir zrüggcho sy, hei die vom Heim mym Mamie erklärt, dass es doch besser sygi ihn bi ihne z'lah. Er het nume no paar Monet dört gläbt.