Wo mir Hinecht di feini Schoggi am gniesse si gsy, isch mir e Gschicht i Sinn cho...
Mir hei es paar Monet ir Länggass gwohnt u das vis à vis vor Schoggifabrik Tobler. Es het immer wieder fein nach Schoggi gschmöckt. Afangs Dezämber het's plötzlech vor der Schoggifabrik es Plakat gha mit em ne Samichlous druf u em ne Pfyl. I bi du däm Pfyl nache u ar Reception go Frage, wo der Samichlous sygi. Di Frou am Schalter het mi gfragt, öb my Vater oder d'Muetter ir Tobler tüeg schaffe. I ha du g'antwortet: "Nei, es schaffet keis vo dene da aber i wohni vis à vis u schmöcki geng di feini schoggi. Mir syge no nid lang zrügg vo Afrika wo's eh ke Schoggi het ggäh". Di Frou het es kurzes Telefon gmacht u het mir gseit, i chönni byr zwöite Tüüre rächts klopfe und ynegah. I ha das gmacht. I däm Büro isch e Maa am ne grooosse Schrybtisch ghocket. O ihm han ig myni Gschicht verzellt. Dä het o Fröid gha dranne u het mir gseit, leider chönn är mi nid zum Samichlous lah, dä syg scho ume gange aber er het mir es Päckli ggäh. Dört drynne het's feini Toblerone Schoggi gha. Er het eim vo syne Mitarbeiter der Uftrag ggäh, mir e Teil Fabrik z'zeige.I ha mi härzlech bedankt u bi fröhlech ume Hei zue.
Bild bei iStock