Gester am Morge het mi uf di 9.30 Uhr d'S. is Spital gfahre. Es isch so schön, so Fründe z'ha wo bereit sy yz'springe u somit o d'Familie z'entlaste. Danke!
Es het fasch zwöi stund düüret, bis myni Bluetwärte sy bestimmt gsy u der Arzt het chönne d'Dosis vor Chemo i Uftrag gäh. Somit het mi nid der Stephan chönne Hei tue. Der David isch du am haubi Zwöi cho. I bi so kaputt gsy, dass ig nid viel mitübercho ha...
Während der Chemo het mir e liebi MPA vor Praxis vo mym Husarzt aaglütte für mir z'säge, dass ig myni bstellte Medis nid müess hole. Si fahri z'Bigle düre u chönn se mir verbybringe. Das isch ja e super Service!
I ha der ganz Namittag meh oder weniger gschlafe u zwüschyne es Telefon abgnoh für z'säge, dass ig nid mag...Es isch scho krass, wi das Züg müed macht! Am Abe bin ig kurz fit gsy u bi schnäll de Junge vom ZäSi (Jugendtreff Zäme Si) go nes Bsüechli abstatte. Si hei dusse brätlet. I ha's aber nid lang usghalte u bi müed is Bett gheit. I ha tatsächlech bis am Füfi düregschlafe.
I gniesse's mit myne Junge aube z'Nüni z'näh. Hüt isch no der Grossvater, my Schwiegerpapa derzue gstosse.
E liebi Fründin isch spontan cho nes Kaffi näh. Es git so Fründe wo me nid sehr flissig gseht, aber we me se gseht, de isch es wi wenn me gar nid so lang wär usenang gsy. Me fahrt eifach dört wyter, wo me ufghört het...