Während em Hushautlehrjahr han ig i re Stadt vom Kanton Bärn d'Ufnahmeprüefig gmacht für d'Usbiudig vor Krankeschwöschter. I bi denn 17 Jahr jung gsy u no nid so weise...Bim Ufsatz won ig ha gschriebe isch s'Thema gsy: mein Vorbild. I ha denn i mym jugendleche Übermuet übere Apostel Paulus gschriebe.
Dass si mi nid hei wölle isch für mi nid der Wältundergang gsy aber was mir no lang weh tah het, isch der Grund gsy wo si aagäh hei, nämlech mys Dütsch sygi no nid gnueg guet. I hät viu lieber gha, si hätte mir diräkt a Kopf usegseit, dass si keini Missionare wölle...I ha nämlech denn im Zügnis e 6er gha...
Das het mi derzue bewoge, no es Jahr Froueschuel aaz'hänke. Da ig ke Französisch u wägem Aargou o ke Huswirtschaft u Choche, han ig nume 22 Stunde Schuel gha.
I ha beschlosse gha, nach däm Jahr z'ersch dür e Summer mit der Zältkirche underwägs z'sy u nächär uf Gunten i d'Bibelschuel z'gah. Drum han ig müesse e Job ha. Im Migros a der Marktgass in Bärn, hei si für im "Do it" öpper gsuecht wo stundewys ar Kasse het chönne sy. Da ig als Teenie im Supermarkt wo im glyche Huus wi mir gwohnt sy, ar Langgass gsy isch gschaffet ha gha, han ig mi uf die Stell beworbe. Das isch so gange, dass ig im Migros gfragt ha wo der Chef syg, i wöll mit ihm rede. Si hei mi i ne Büro gschickt u dä Maa het mir zueglost. I ha ihm erklärt, dass si mi bir letzte Stell usgnützt heige u mir nid das zahlt hei wo mir abgmacht hei gha. I ha ihm gseit, i wöll nün Franke ir Stund u süsch chöm ig nid. Är het gmeint, das sygi grad chly viu. Ig überchöm achti füfzg. I ha du gmeint:" d''Migros wärdi wohl das füfzgi pro Stund no vermöge."Är het du gfunde, okay u ig ha ir Wuche rund zwänzg Stund dörfe schaffe. Ar Kasse näbedraa isch e glychaltrigi gsy wo di ganz zyt dört gschaffet het. Si het vo sich us afa verzelle wi si viu verdieni u drum gar ke Lehr wöll mache. Si het siebni füfzg ir Stund übercho. I ha du nid z'Gfüehl gha, dass ig ihre mi Lohn müess unger d'Nase rybe. Es het gnueg anderi Theme gha won ig ha chönne druf uswyche...