Ja, byr Geburt vo mym ältere Brüetsch in St.Etienne, Fankrych, het's fasch es Gstürm ggäh. Wo my Vater d'Geburt isch go aamälde het der Beamte my Vater gfragt, öb er eigetlech spinni, mit syre Schwöschter öppis z'ha...Es het drum gheisse: Heinrich, vom Emil u vor Frieda Spörri u Lydie, Tochter vom Emil u vor Frieda Joss. Eh, ja we me d'Nachnäme nid aaluegt...
Uf em obere Bild sy s'Josse. D'Grandmaman Frieda isch e Bühlmann gsy vo Courroux u der Grandpapa isch in Bümpliz ufgwachse gsy. Si hei mängs Jahr im Jura gläbt wo der Grandpapa bi de Von Roll gschaffet het. Er het sich bym Schaffe paar Mal der Kopf fescht aagschlage u het wäge däm zwüschyne starchi Depressione gha u isch zwüschyne ustikket, dass er id Psychi het müesse. Wo myni Eltere hei gwüsst, dass si i d'Mission wei u nümme d'Eltere finanziell chöi understütze, hei si mit Gott abgmacht, dass Är ihn heile wird. Vo denn aa, isch es am Grandpapa immer besser gange. Är isch mit sym Brueder am Ernst e Pionier vom Brüederverein in Bärn gsy. Syni letzte Jahr het är bi üs a der Länggassstrass gwohnt, er isch 87 Jahr alt worde. D'Grandmaman isch mit 74 Jahr gstorbe wo mir no in Kamerun si gsy. Das isch denn schlimm gsy! Mir hei's am Tag vor Beärdigung per Telegramm vernoh gha...
Uf em untere Bild sy Spörris: Si hei in Aarburg es Optiker u Uhrmachergschäft gha wo my Unkel u später zwe Cousins bis vor paar Jahr wytergfüehrt hei. O die Grosseltere hei über 25 Jahr bi sich Daheime Stubeversammlige gha vom Brüederverein. Während em Krieg het's sech umegsproche, dass es bi Spörris immer öppis z'ässe gäb. Drum het's öppedie Lüt gha wo scho am Morge derhär cho sy, we am Namittag Versammlig isch gsy. Einisch hei sech der Papi u sy Brueder so gfröit uf e Küngel wo der Grossvater am Samstig für e Sunndig gmetzget het. Ihri Fröid isch ihne fasch vergange wo plötzlech 24 Lüt am Tisch sy ghocket. Es Tanteli wo aube het ghulfe choche het useggäh u immer meh der Kopf afa schüttlet. Si het plötzlech gmeint: "i weiss also nid wi mänge Scheiche dä Küngel gha het..." Es het sogar no Räschte ggä, sodass 12 Lüt no es ganzes Stück hei übercho. Der Grossvater het drum d'Ystellig gha, wenn Du gnueg chochisch de het der Säge gar ke Platz meh. I mah mi guet a syni Tischgebät bsynne. Er het würklech der Säge us ganzem Härze erbittet. I weiss, dass är won er scho vieli Änkle u Uränkle gha het, für jedes einzelne mit Name bättet het. S'Grosi isch mängisch explosiv gsy. Einisch wo der Papi als Bueb vo de Kadette mit syre Trummele d'Stägen uf cho isch und en Evangelist sy Huet abzoge für id Stubeversammlig het dä ihn gfragt: "Wotsch Du mit Dyre Trummele i Himmel cho? "Da het's us der Chuchi vom Grosi füreposuunet : "I myre Bibel steit: Lobet den Herrn mit Pauken und Zimbeln!" Da het dä arm Brueder fasch der Huet wieder gnoh...Mys Grosi het vo Vierzgi aa Polyarthritis gha. Si isch 93gi worde u alli wo mit ihre di letschte Jahr im Zimmer si gsy, wüu si bettlägerig isch worde, hei vernoh wi me i Himmel chunnt...
Der Grossvati isch e chly jünger gsy als syni Frou u isch ersch mit 95gi is Altersheim. Er het drü Wuche vor sym Tod mit 99gi der Pfarrer lah cho u ihm gseit, was a syre Beärdigung söll gseit wärde. Er het ihm sogar no nes längs Gedicht ufgseit. Er isch a re Grippe gstorbe. Das isch e liebe gsy, der Grämpi!