I der ELF isch im 1981 s'Schueljahr vo Summer bis Summer gange u im Aargou het's im Früehlig aagfange. I ha ja di Füfti klass zwöi mau gmacht gha u ha somit myni Nün Schueljahr im 1980 bereits absolviert gha. es isch also kes Problem gsy, im Früehlig 1981 d'Schuel z'verlah. Vo 24 Schüeler sy 22 as Gymi u ig bi eini vo dene zwöi wo süsch ihre Wäg gange sy. I ha wölle mys Dütsch verbessere, drum bin ig is Aargou. I bi also uf Aarburg is Huus wo my Papi ufgwachsen isch.
Uf em Bild wo zum Blogytrag passt, gseht me e Dechu vo re Suppeschüssle. Mys Mamie het da druff s'Städtli vo Aarburg mit der Festig u der Stadtkirche gmale. E so gseht's o uus.
Myni Tante, d'Frou vo mym Götti het mängs Jahr hushaltlehrtöchtere gha. I ha dört glernt wösche, glätte, choche, putze u das gründlech. Myni Grosseltere sy denn no im glyche Huus gwohnt. Es het fei mängs Hemmli z'glätte gha, 16 bis 20 ir Wuche. Am Samstig han ig nach Ladeschluss am Vieri no im Optiker, Uhrmacher u Bijouteriegschäft vom Unkle der Bode Blochet. Da het me mit ere Machine wo Blocher gheisse het, der Bode poliert. Am Sunndig bin ig aube am Sächsi am Abe ume dört gsy.
I d'Schuel bin ig einisch ir Wuche uf Lenzburg. I mag mi no guet bsinnet wo der Dütschlehrer üs di ersti Prob umegäh het u stärnsverruckt isch gsy. Er het sich so ufgregt, dass nur ei Sächser sygi gschrybe worde u dä no vo der "Wälsche". Di andere Modis vor Klass sy alles Dütschschwyzere gsy...