Der Stephan het hüt Geburtstag. Er isch scho am morge kurz nach de Sächse cho ne Chai Latte trinke. Am Morge am 10i isch d'Frou N. vom Mobile Palliativdienst Emmental bi mir gsy. Mir hei zäme e Pflegeplan erstellt. Wenn ig irgend e Frag zum Thema vor Krankheit ha, de chöi mir das zäme aaluege. I bi froh, i der Schwyz z'läbe, wo's mir möglech isch so lang wi's geit Daheime z'blybe. Vor Allem bin ig für mys grosse Umfäld dankbar.
Zum Zmittag isch der Stephan mit de zwe grosse Giele cho. Mir hei Corona Konform ggässe: Füf Lütt us zwöi Hushalte...Es isch ganz komisch gsy, so wenig Lüt u das am Geburi...
I bi am 15.30 Uhr i d'Onkologie go der Picc spüehle u der Verband wächsle u ha mir e Schutz gkouft für chönne z'Bade. I ha's Hinecht ir Badwanne ygweiht. es isch e gueti Sach!
Hüt han ig aber vor em Bade di füfti u letzti Bestrahlig gha. I bi sehr dankbar han ig die Wuche nid so krass greagiert wi bi de letzte Bestrahlige. I ha syt em Sunndigmorge zwöi Mal im Tag, Mittu gschlückt gäge z'Erbräche. Das het gnützt!