Am 12.40 Uhr han ig Hüt Bestrahlig gha. Drum han ig vor em Mittag scho ei Portion ggässe. Der Kurt isch Hüt in Willisou, drum giben ig am David s'Poulet Curry mit Hei. Der Stephan holt mi am 12.15 Uhr. Er het grad S'Budeouto ir Garage u chunnt mi mit em ne VW Cabrio als Ersatzwage cho hole. I bi rächt erchlüpft. Es luftet so fescht, dass mir scho bym Pronto Kreisel s'Dach zuetüeh. I ha für ihn o no e Räschte Maispizza. Er cha das i dere Zyt won ig bestrahlt wirde ässe. Es geit 10 Minute u scho bin ig ume zrügg. Er fahrt mi ume Hei und ig gah gärn ume go liege. Am Vieri chunnt Bsuech vo drüne Eritreerinne. Si bringe mir Maisbrot, Injera, scharfi Sosse u nes feins Linsegricht. Nach em Füfi müesse si gah, da ihre Chauffeur e Termin het. Si bätte all Tag für mi u si überzügt, dass es mir gly besser geit.
I ha no nes Telefon vo re Kusine u vo mym Mamie. Hinecht bin ig allei, der Kurt het e Sitzig u der M@i u d'Sabrina sy hurti zwe Täg go flittere. I mag's ihne gönne.