Sobald mir e Wohnig hei gha in Bärn, hei myni Eltere es Klavier gkouft. I ha scho immer wöue Klavier spiele u ha gly Mau druf afa klimpere. Myni Eltere hei mi wöue fördere u hei im Länggassquartier, e Klavierlehrerin gfunde. Am Afang isch es no einigermasse guet gang aber je meh Note ume si gsy, je weniger Fröid han ig dranne gha. Si het e Vorliebi gha für Dvorak und Co. Ig ha am liebste Lieder begleitet. Scho gly han ig afa d'Lieder vor Chi Coltrane singe u ha d'Begleitig sälber improvisiert. Mit der Lehrerin isch es zum Bruch cho won ig s'Stück "Für Elise" ha wölle lerne u si mir gseit het, das sygi viel z'schwierig für mi. I ha du das innert paar Wuche vollständig uswändig glernt und ihre mit de Note uf em Kopf gstellt vorgspielt. Ihre han ig erklärt, ig bruuchi si als Lehrerin nümme. Si isch zwar hässig gsy, het aber müesse zuegäh, dass ig begabt sygi. I ha also e chly meh als eis Jahr Stunde gno... Am meiste gsunge u gspielt han ig mit mym ältere Brüetsch, är ar Gitarre u mängisch no mit Muugyge u ig am Klavier. Mir hei mit de Stimme, ohni gross abz'mache chönne harmoniere u tüe's no Hüt.