Myni Eltere hei's nid nume eifach gha mit mir. Im Teenie Alter bin ig viu wäg gsy. Im Summer bin ig aube vom Monbijou is Marzilli go bade. Ig wo hüt so ne Gfröhrli bi, ha's aube gschafft scho is Wasser we's erscht 11 Grad isch gsy...Nach der Schuel bin ig viu "uf e Stei" das isch im Bahnhof i der Christoffel Unterfüehrig gsy. Es het dört ganz viu schrägi Type gha. I bi aube dört ghocket u ha d'Lüt beobachtet u viu Gspräch gfüehrt über Gott und die Welt...I ha sälber weder grouckt no kiffet, ha aber freackig usgseh. I ha Mau my Grossvater gfragt, öb är mir es alts Hemmli gäb. Är het mir du e so nes schöns gäh, das my Papi das no bis is höchen Alter treit het...
Mys Wucheprogramm het mit 15 i e so usgseh: Jede Tag ussert Samstig/Sunndig Schuel. A den Abete isch gsy Mändig: Bandprob, Zischtig: Bibustund won ig aube Klavier gspielt ha, Mittwuch: Bandprob, Donnstig: Jugendchor, Frittig: Oneway Keller mit Singen am Loebegge, Samstig: Jugendgruppe u Sunndig am Morge am 09.15 Uhr Gottesdienst won ig für e Worship Klavier gspielt ha. Am Sunndigabe isch einisch im Monet e kurze Input gsy mit viel Musigg. Dört sy mir aube als Band ufträtte...
Mindestens einisch im Monet han ig e starchi Migräne gha wo mi is Bett gleit het.
We myni Eltere gfunde hei, es sygi z'viel "Action", de han ig aube droht grad alles a Nagu z'hänke... Drum hei si mi i Rueh gla...