Ja, jetz chunnt si draa, myni Schultere wo so viu düregmacht het...Für die Schultere z'bestrahle hei si mir e Masken aagfertiget. I wirde mit der Maske a Tisch fixiert. I frage Morn, öb si es Föteli vo mir mache für e Blog...Hüt am Morge isch my Schatz mit mir uf Bärn u het mi ir Insel usglade. I bi am 9.30 Uhr bstellt gsy. I ha no myni Parkkarte wölle bsorge u bi chly früeh gsy. Am 9.22 Uhr hei si mi scho gholt. Am 9.48 Uhr het der Kurt gmeint är sygi viu z'früeh. Zwöi Minute später bin ig scho ume dusse gsy. I ha unbedingt Trainerhose bruucht. Mir sy is Shoppyland uf Schönbühl. Der Kurt het no Socke bruucht us em Manor u ig bi gly abe i d'Migros. Es het mir fasch der Schnuuf gnoh. Mit Maske u soo viel Froue wo enang fasch z'Züg us de Häng gschrisse hei...es het vieles zum 1/4 Prys gha. I ha eifach Boumwulligi Hose wölle u bi gly a d'Kasse. I bi sooo froh gsy, im Outo ume dörfe ohni Maske z'sy...
Es isch mir bis jetz nid schlächt. I ha scho gester aagfange Medi näh gäge das. Was mir o no nützt sy di feine kandierte Ingwer vor Meränggefabrik vo näbedraa.