I der Schuel bin ig abegmacht worde wäg mym afrikanischen Akzänt im Französisch. I ha du ir Pouse die zämegschlage wo mi usglachet hei. Ja, i bin ne Ussesytere worde. Da sech di Wältsche entweder ir Katholische oder ir Reformierte Französische "Paroisse" troffe hei, han ig nid derzue ghört. I bi am Pavillonweg 13 id Chiuche. Dört het's der Oneway Keller gha. Jede Frittigabe het e Gruppe vo junge Christe am Loebegge gsunge u Penner oder süsch interessierti Lüt um e Bahnhof um mitgnoh. Im Keller het's de öppis z'trinke ggäh u gueti Gspräch derzue. Da ig nid viu mit Glychaltrige ha chönnen afaa, sy myni Fründinne einigi Jahr älter gsy. I ha mi o ir Jugendgruppe vor GFU Bärn wohl gfüehlt. Dört han ig Fründe gha u ha mi sälber chönne sy, nid wi ir Schuel...Hüt gseht's ganz anders uus. Wo früecher höchi Muure sy gsy zwüsche de Chiuche u Freichiuche sy Hüt schöni u konstruktivi Fründschafte entstande. I bi ja letst Jahr vor Reformierte und Katholische Chiuche aagstellt worde.