Es isch wunderschön aber zum Glück bin ig i re Techi ypackt gsy, s'Mamie o. Am Abe isch es im chlyne Rahme gmüetlech wytergange. Der Stephan u d'Flavia hei es vo M@i gwünschts Menü gkochet: Cordon-bleu oder Wienerschnitzel mit Nüdel, Rüebli, Schwarzwurzle u Broccoli. Zum Dessert, het's Schwarz u wysses Schoggimouss, Kokos-Schoggi Blächkueche alles schön vor Brutmamma dekoriert.
I ha trotz vollem Buuch, paar Mal guet gschlafe.
üt am Morge het mi der Kurt uf Burgdorf gstellt. Nach der Bluetentnahm han ig zum Onkolog chönne. D'Blurtwärte sy im Normberyych gsy. Es geit mir im Gross u Ganze scho besser als Afangs Therapie usser, dass ig extrem uf d'Bestrahlige greagiert ha. Was o ne Schönheitsfähler isch, dass der Tumormarker gstiegen isch. Me dörf däm nid z'grossi Beachtig schänke...I gah ab em Mändig di füf Bestrahlige go mache u erhoffe mir e Besserig vo de Schmärze ir rächte Schultere. I ha erscht am 18. März ume Chemo u denn bespräche mir de s'wytere Vorgah. Mir löh de ume der Tumormarker la mässe u luege de ahand vom ne CT, öbs Veränderige ggäh het.
I ha bis jetz keni Näbewürkig vor Chemo, ussert dass ig müüüed bi...