Afangs Jahr het d'Huswirtschatslehrere vo jedere Schüelerin wölle wüsse, was der Papa schaffe tüeg. Es isch uffallend gsy, wi si üs nid glych behandlet het. Einisch, bym Ufruume u Putze, het si mir der Uftrag ggäh gha der Tisch abz'ruume u a re andere, der Chuchibode Füecht uf z'näh. Das Meitschi het nid gwüsst, wie me e Hudu a ne Fägbürste tuet. I ha ihre zeigt wie u da isch d'Lehrere derzwüsche cho u het usgrüeft. Das Modi het du der Lehrere umeggäh u gmeint: "settigs macht bi üs d'Putzfrou u nid ig!"
Im Zügniss, het das Modi es Füfi gha u ig es Vierehaub. Ihre Vater het drum im Budeshuus gschaffet u myne isch haut nume en arme Pastor gsy. Alli hei gwüsst, dass mir d'Schuel nume mit Understützig vor Pro Juventute vermöge...