Ecole de Langue Française. E so het di Schuel gheisse won ig vor füfte bis i di Nünti Klass bsuecht ha. I ha wägem höche Niveau vor ELF, di füfti Klass wiederholt. Ar vielbefahrene Schwarztorstrass im Quartier Mon Bijou, in Bärn isch si gsy. Im ne alte Huus wo me nümm uf d'Balkön het dörfe. Da ig ir Sekundarschuel bi gsy, het's für jedes Fach en andere Lehrer gha. Ab der siebte Klass isch me i Progymer cho oder de het me grad id Chlyklass müesse. Drum han ig aube sövu glernt, dass ig nid ha häre müesse. Die wo ir Chlyklass si gsy, die hei müesse s'ganze Stägehuus ufe loufe u sy so richtig abegmacht worde. I d'Pouse hei mir müesse byr Ample über d'Strass i ne öffentleche Park u das mit ere andere Schuel. Es isch e total elitäri Schuel gsy. Es sy es paar Diplomatekinder, Kinder vo Bundesagstellte u süsch vo ryyche Wältsche. Myni Schuelkamerade sy di meischte in Bärn gebore, hei aber kes Wort Bärndütsch gredt. Mir hei e stränge Düdtschlehrer gha. We mir Dütsch gredt hei, het jede müesse merke, dass mir Wäutschi sy. "Ich habe hunger" het gheisse: "isch abé ungèr".