I ha immer no s'Bild vor neueburgische Schuel gha won ig Mau bsuecht ha. Die Lehrerin wo mi verstande het u mi uf die Zyt zrügg i di afrikanischi Schuel vorbereitet het, das isch für mi der Inbegriff vor schwyzer Schuel gsy...I ha o erwartet, dass ir Schwyz alli glych sy, da ja alli wyss sy...I ha mi so richtig druf gfröit, ändlech de so wi di andere chönne z'sy. Myni Eltere hei der Ydruck gha, dass e Wächsu i di dütschi Schuel für üs Kinder z'schwierig wär gsy. My Papi het gwüsst, dass är im Sekretariat vor GFU (Hüt: BewegungPlus) in Thun wird go schaffe. Si hei zwöi Optione gseh: entweder im Bärner Oberland wohne u mir Kinder wäre uf Rougemont i d'Schuel oder in Bärn i d'Stadt u dört het's en "École De Langue Française" gha. Mir sy also i d'Schwyz zrüggcho u hei z'ersch i Feriewohnige müesse huuse wüu myni Eltere e Wohnig hei müesse sueche u finde. Nach einige Wuche isch es klar gsy: mir hei e Wohnig ar Länggassstrass, in Bärn übercho. D'ELF isch ar Schwarztorstrass gsy.
Uf däm Bild isch üsi Familie a re Konferänz in Kamerun verabschiedet worde. Da hei mir überall, als Familie, vierstimmig öppis gsunge. Das sy myni erste Bühne Erfahrige gsy...mängisch sy hunderti vo Lüt am zuelose gsy...