Ir Primarschuel sy mir um di 1000 Kinder gsy u da bin ig di einzigi Wyssi gsy. Es het no paar wyssi Giele gha. Im 1976 han ig myni Kindheit scho verlore gha u wi me uf em Föttlei gseht rächt erwachseni Allüre gha. Won ig gwüsst ha wi das im Lycée wird, (Sekundarschuel und Gymnasium, nach französischem Systhem) han ig den Eltere gseit i wöu nid dört id Schuel. Dört wär ig mit zwöi wysse Giele unger zwöi tuusig Schüeler, di einzigi wyssi gsy. I ha gmerkt, dass es zur Tagesornig ghör aus Modi apöblet z'wärde u my Brüetsch het müesse mit allne Giele, am Sarg vom ne Modi verbyloufe. Si isch byr Abtrybig vom Baby wo si byre Vergwaltigung ir Schuel erläbt het gha. I ha es paar Nächt nid gschlafe u ha der Horror gha bym Gedanke dert häre z'müesse. Der Papi isch wieder einisch flach gläge. Er het drüü Diskus Hernie gha wo nie sy gflickt worde. Es het derzue gfüehrt, dass er mängisch nüm het chönne ufstah. I ha my Vater nie ohni Schmärze kennt. Er het sälte gjammeret u het ganz vielne Lüt chönne Trost u Zueversicht bi Schmärze gäh. Er het se verstande. Es isch i däm Jahr e so schlimm gsy mit syre Gsundheit, dass der Papi sech het müesse go erhole. Er het zum Andere derzue no e ganz e starchi Malaria gha wo ihm der Härzmuskel entzündet het. Er isch is Grasland, für paar Wuche i Norde vom Süd-Weste vo kamerun i nes Kloster. Won er zrügg cho isch, het er beschlosse gha, dass mir aus ganzi Familie id Schwyz zrügg gönge. Es isch e spezielli Zyt gsy, z'entscheide was nähme mir mit, was verschänke mir? Was verchoufe mir? D'Eltere hei no chönne der ganz Büecherlade am ne Afrikaner übergäh wo i der Stadt e Lade het uftah. Das het se no gfröit.
Am 31. Juli 1976, sy mir du vo Douala uf Züri gfloge.