Das isch myni Fründin gsy vor Primarschuel "Le Petit Joss". Mir sy meistens näbenang ghocket. I de meiste Klasse isch me nach Note ghocket. Die wo ufpasst hei u guet sy gsy, sy vore ghocket u die wo nid hei wöue mitmache, hinger. I ha's aagsträbt u gschafft immer ir erste Reihe z'hocke. I ha ja wöue Doktor wärde... Das isch byr Sylvie o der Fall gsy. Ihre Vater isch der Gouverneur vo üsem Gebiet gsy. A dere Schuel sy Kinder vo wohlhabende Kameruner gsy wo nid hei wöue ihri Kinder zu Franzose mache ir tüüre Französische Schuel. Mir hei zwar o a üsere Schuel di französischi Gschicht glernt u nüt afrikanisches...
I ha paar Mal zur sylvie dörfe. Si het im ne mehrstöckige Huus mit Klimaalag u mit Bedienstete gwohnt.
Es het aube der Sylvie bi mir o gfalle, wenn ig se ha dörfe ylade. Si het einisch gfragt, wiso mir ke Klimaalag heige. I weiss nüm, was ig g'antwortet ha. si het ömu nächär nüm gfragt.
Stell dir vor...das Kleid wo si uf der Foto anne het, heigi Goldfade dranne gha...Die Beziehig isch e gueti Vorbereitig uf my Wächsu id Schwyz gsy.