Bis jetz han ig jedes Mal ir Chemo, während zwöi Stund e Hube anne gha. E halb stund vor mit NaCl , e Stund während u e hau Stund mit NaCl nach der Chemo Infusion.
I ha jetz so stark uf d'Bestahlige Reagiert, dass o myni Haar müesse draa gloube. Wenn ig mit der Hand dür's Haar gah, der chunnt grad e Hampfele Haar mit...Hüt am Morge han ig ume Chemo gha. I ha erwähnt, dass mir d'Haar usgheie u da het d'Pflegefachfrou gmeint: "de bruuchet dir d'Kältehube nüm. We si föh afa usgheie, de nützt si nümme." Also muess ig mir das nüm aatue. Es isch nämlech mega unagnähm gsy. I dere Hube zirkuliert Yswasser u gfiert eim d'Haarwurzle y, damit d'Chemo nid bis dört häre glangt u so cha me der Haarusfall vermindere.
Syt der zwöite Bestrahlig füehlen ig mi nid so guet. U ab dere Wuche het's überall Haar...
I wott ke Perügge. I wirde mit Käppis u Tüecher schaffe.
I ha ja so nes Moos gha, dass wär mi nid kennt, dä gseh'ts no nid. I gspüre's halt u ha z'Gfüehl i heigi scho nes Pfund verlore...
Hüt am Nami isch sehr ruhig. I bi e Zyt lang ir Stube, mit offener Tür a der Sunne ghocket. Das het guet tah Vitamin D yyz'näh uf natürlecher Art.
I ha also nächst Wuche frei vo Chemo derfür 5x Bestrahlig.