I de Ferie bin ig am liebschte uf Banga id Krankestation zu de schwyzer Krankeschwöschtere. Da isch es so interessant gsy. Am Morge het's aube gäge 200 Lüt gha wo druf gwartet hei, dass si Z'erscht en Andacht u Gebät u nächär e Diagnose u Behandlig übercho hei. Di schlimmschte Fäll hei si is Spital gschickt. Di Station isch im Südweste, im Änglische Teil vo Kamerun. Hüt isch es im Chriegsgebiet u wird vo Rebelle bsetzt.
I mah mi bsinne, dass ig bi re Geburt ha dörfe derby sy. Einisch han ig der Finger vom ne Maa müesse häbe währenddäm s'Schwöschter Greti gnäit het. Es het mi fasziniert di Arbeit mit de Lüt u zue z'luege wi Behandlig u Medikamänte u vor allem Zyt u o Gebät Heilig bringt. I bi scho früeh mit em Tod i Berüehrig cho. Es het mi am meiste bruucht wo's es chlyses Chind isch gsy. Da het d'Muetter dür s'ganze Spital gmögget. Das isch eim dür March u Bei. Es isch es Wächsubad vo Gfüeü gsy. Wenn öpper is Spital het müesse, de isch öpper vor Familie mit u de hei si müesse für di kranki Person choche. Es het äxtra es paar bedachti Füürstelle gha.