Am Samstig han ig vo mym phänomenale Handwärker vo Schwiegersuhn gschrybe. Är het us em ne Chäschessi es Bädli. Er het's ungerdessi isoliert u het no e Grill ybout wo grad s'Wasser o no wärmt. Nach däm wunderschöne Samstig dusse, han ig der Sunndig mehrheitlech dynne verbracht. Am Morge isch my Schatz id Chile u het sech mit WhatsApp Videocall mit mir i Verbindig gsetzt. I ha derdür chönne am Gottesdienst teilnäh. Das tüecht mi e sehr e gueti Lösig für mi. Won är über mi öppis verzellt het, han ig grad müesse go de Chräie rüefe... I ha düre Morge du drüü Sorte Medis gschlückt gäge Übukeit. Mir sy zum Zmittag bi üsne Nachbare yyglade gsy. I ha tatsächlech fei e chly möge: Kängurufleisch u anders Fleisch uf em heisse Salzstei brätlet mit Sösseli, Gmües u Pommes. S'Dessert han ig später zum Zvieri gno. My Brüetsch u d'T. sy z'Fuess derhär cho u hei es churzes Bsüechli gmacht. I bi so müed gsy, dass ig nid e Mal a d'Sunne ha möge. I ha derfür ume stundelangs Telefon mit em Mamie gmacht u bi glücklech gsy het si ume uf ihre Balkon dörfe. Gäge Abe het no ne Fründin usAltebärg Zyte mah als e Stund mit mir telefoniert sodass ig gar nüm ha möge schrybe.
Hüt isch e ruhige Tag. Am Morge isch d'T. cho. I bi so froh, dass si vo jetz aa d'Rächnige vom Mamie wird übernäh u der E. ihri Stürerklärig. I ha tatsächlech Hüt süsch nüt los!