Im Huus hinger üsem Bananeboum u Zuun, in Bonabéri het en armi Familie mit zwöi Töchtere gläbt. Di einti isch glych alt gsy wie ig. Si het Herbaba gheisse. Si het zum Stamm vo de Haoussa ghört, es muslimisches Nomadevolk us em Norde vom Steppeland vo Kamerun. Herbaba het nie würklech mit mir dörfe spiele. Ihri Muetter het se aube mitgnoh ufs Fäld. I bi nüm ganz sicher aber i gloub si het nid id Schueu dörfe. Ihri Eltere sy der Meinig gsy, dass Biudig nüt für Meitschi isch. Ihres Huus isch us alte Brätter gmacht gsy, het aber scho überall Löcher gha. Ihri Eltere hei es nöis Palmdach bruucht u hei derfür d'Herbaba am ne Maa verchouft wo scho mehreri Froue het gha. Wo si du mit Elfi d'Mens het übercho, het si sech müesse vo ihrem Maa go lah schwängere. Si het no bi der Muetter dörfe läbe bis zur Geburt vo ihrem Chind u vo denn aa han ig se nie meh gseh.