Di Letschti Nacht isch gar nid öppe cool gsy. I ha paar Mau müesse gögge u ha mehrmaus gschlafe. Hüt am Morge bin ig gräderet u es isch mir nid wohl. I bi viel gläge, Hüt. Es isch für mi e so nes Gschänk, dass myni Liebe um mi um sy. Scho am Morge früeh gsehn ig fasch alli u di andere gsehn ig dür e Tag per WhatsApp oder rede mit ihne am Telefon. My Schatz het scho Gester am Abe mit üsem Jüngste s'Zmittag vo Hüt vorbereitet. I bi so froh chöi si alli guet choche. Am Mittag het mir e haubi Portion Haxe mit Sauce , Rüebli u Polenta gmundet. Es isch mir sogar blybe. D'Sarah isch Hüt mit mir uf di Drüü uf Bärn gfahre. Mys warme Bett wär mir lieber gsy als d'Bestrahlig...I bi füf Minute vor der Zyt dört aacho u scho hei si mi gholt. I ha nid e Mau Platz gno im Wartzimmer. Am Vieri sy mir scho ume Daheime gsy. I bi nächär ume sofort go liege. Jetz het my Schatz us Räschte es leckers Znacht kochet. I ha ume e chlyni Portion gnoh. Trinke tuen ig scho der ganz Tag Tee u Coke. I bi so froh han ig Morn u Übermorn ke Therapie!