Wo mir in Tiko gwohnt hei, sy aube d'Truur Züg a üsem Huus verbi für di verstorbeni Person am Friedhof byz'setze. Si sy meistens gsprunge wüu vor Hitz der Lyychnahm scho het aafa stinke. Da isch di verstorbeni Person am Todestag begrabe worde. Di wichtige Lüt sy dennzumal yybalsamiert worde u mänge Tag im Huus vor Truurfamilie ufbahrt worde. U z'Nacht hei mir nid chönne ruhig schlafe wüu d'Toteklag u ihr Tänz um s'Huus um vom Verstorbne so lut si gsy.
Später hei si nüm alli am glyche Tag Beärdigung gha. Bi wichtige Lüt het me der Körper mängisch über Monate i ne tüüre Kühlruum gstellt. Dä Kühlruum isch meistens bym Spital gsy. Der ganz Tag oder je nach Hitz nume zu bestimmte Zyte isch im Huus vor Truurfamilie der Lychnahm unkühlt ufbahrt worde. Dört hei d'Lüt vor Person mit Ach und Krach u Wehklage chönne go Abschied näh. Di Prozedur het meistens e Wuche duuret u d'Lüt sy Schlange gstande u sy mängisch ersch nach Tage bym Sarg aacho. Da isch der ganz Tag ums Huus um Tanzt, gässe u Palmwyy trunke worde uf Chöschte vor Truurfamilie. Di verschiedene Ritual wo si aube no erlediget hei sy üs Schwyzer nid ghür gsy...