Gester am Abe sy my schatz u ig mit em ne befründete Paar i Appebärg. Mir hei wieder Mau uswärts wöue ässe u da me nume aus Hotelgast öppis überchunnt, hei mir das Angebot gnützt wo mir scho lang dört gseh hei. Buechet hei mir erscht churzfrischtig, da mir nid gwüsst hei wie's mir geit. Gester am Morge han ig bau Angst gha müessen abz'säge. Es isch mir nach em Kaffi e so schlächt gsy, dass ig's grad umegäh ha. I ha du e Tablette gschlückt gäge z'Schächtsy u da het's besseret. Zum Brunch sy der David u syni zwöi Schätzelis chi. Es het so guet tah, der schlafend Noé uf mym Buch unger myre Dechi z'ha. D'Jael het mir e wunderschöne Schärischnitt gmacht. Am Zwöi han ig no nes Fotoshooting gha fürs Livenet.
Da Obe links isch s'Menü vo Geschter Abe. Mir hei z'ersch no ne feine Wysswyy aus Begrüessigsapéro übercho. Zum Znacht hei mir e St. Saphorin u Wasser trunke. I mag syt Aafangs Therapie fasch ke Alkohol meh trinke. Es gluschtet mi eifach gar nid.
I bi froh gsy, myni Tempur Uflag bi mir z'ha u ha tatsächlech bis hüt am Morgen am Füfi guet chönne schlafe. I ha nächär no dööset u am 08.30 Uhr hei mir abgmacht für zum Zmorge. Es het feins Buurebrot, Züpfe, Eiweid Chäs u Joghurt u guets Fleisch gäh. Der Hamme isch sälber gräucheret gsy.
Mir sy gäge Mittag ume Daheime gsy u üsi Fründe sy o gange. Nach ere usdehnte Siesta, sy mir use a d'Sunne es Cherli go mache. My Schatz isch no hurti zu den andere Änkle. I ha nid möge. Öppe am Vieri het my Schatz Baccalao Chüechli Frittiert u derzue no Louch brätlet. Das isch fein gsy. I ha no chly Fernseh gluegt.