Mängs Jahr bin ig mir gwöhnt gsy, dass ar Wiehnachte fasch di wärmsti Zyt isch gsy u mir as Meer id Ferie sy. Mir sy immer uf Victoria, hüt heisst di Stadt Limbe. Dört hets es alts Huus gha vo der Basler mission wo mir hei chönne bruuche. Es sy denn no anderi Missionare vo anderne Missione u o Krankeschwöschtere vo Banga derby gsy. Mir sy aube a ne Strand im Mile Six. Es isch e schwarze Strand gsy mit Lavasand. I mag mi bsinne wi einisch grossi Qualle sy cho. Di einti het der Brüetsch verwütscht u wo ne s'Mamie us em Wasser treit het hets sogar si a de Bei u am Buuch no brönnt vo däm Gift. We mir dört us em Wasser cho sy, hei mir immer wie ne Bruune Schnouz ums Muu um gha. Won ig vor füf Jahr mit mym Maa dört bi go luege, öbs dä Strand no git, hets e Ölraffinerie dört gha. Me cha dervo us gah, dass Afangs Sibezger Jahre s'Öl no ohni Mönschlechs derzuetue eifach is Meer gflossen isch.