Ja, der Papa Spörri isch e Wärk-Missionar gsy u nid e Maa vo vielne Wort. Är isch aube dä gsy wo is Loch gstiegen isch. Das Loch hei si aube gmacht dört wo bouen isch worde. Da het me stunde lang müesse im Loch d'Masse vo Härd u Wasser mit de Füess bearbeite bevor me drus het backsteine i re Form gmacht u se a der Sunne tröchnet het.
Einigi Schuele het er Boue u in Banga ghulfe d'Krankestation vor Mission boue. Dört bin ig de aube im Summer id Ferie.
Won är in Bekoko d'Schuel het wölle boue het ihm der Dorfhäuptling e verhäxte Güggu gschänkt. Me het genau gseh, dass dä isch präpariert isch gsy: Er het eis Oug verstoche gha, ei Flügu broche u het verschiedeni Farbe dranne gha. Der John isch üse treue Boy gsy. Dä het am längste bi üs gwohnt u het am Mamie im und ums Huus ghulfe. Der Papi het ihm e Lohn zahlt u ihm d'Schuel u s'Lycee finanziert. (Sek u Gymi)
Der Papi het am John befohle mit em Mamie zäme dä Güggu z'choche u nächär mit üs am Tisch mit z'ässe. Der John het ihn gfragt, öb är Läbensmüed syg. Der Papi het ihm g'antwortet:" mir wärde dä Güggu mit Danksagig ässe u das wird üs nüt aatueh. Mir wärde am Dorfhäuptling zeige, dass üse Gott stärcher isch als der Woodoo Zouber! Der John het ygwilliget u isch e so begeisteret gsy, dass mir alli überläbt hei. Är isch es halbs Jahr bevor mir id'Schwyz zrügg sy uf Nigeria ad Uni u isch Pastor worde.