Um üses Huus um hets e Maschedrahtzuun gha. Warum das! S'Läbe vo üsne Nachbare het sech mehrheitlech dussen abgspiel. Das heisst, sobau d'Sunne aben isch, sy d'Lüt vor ihrne Hütte oder ungerem Dach vom no nid fertig boute Huus näbedraa, useghocket. Di meischte sy a Bode ghocket.
Mir hei es Vordach gha u das wär ohni Zuun jeden Abe bsetzt worde. Da hesch de Sache gseh u ghört. Im Quartier het der Staat der Wohlstand voraa triebe u Strassebelüchtig erstellt. Überall hei d'Aawohner der Momänt gnutzt u ihre Husstrom gratis dervo abzapft. Mir hei ne schön brav am Huusbsizer zahlt. Einisch hets vis à vis es fertigs Gschrei ggäh. E Jungi Frou isch vom ne Maa a ihrne Haar us ere Hütte zerrt worde. Si isch uf em Land mit däm verhüratet worde u zu ihrem Liebhaber wo üse Nachbar isch gsy uf Bsuech...Es anders Mau hei Eutere e jungi Frou mit em ne alte Sack us em Urwald verhüratet u dä la cho. Dä het se wöue abhole u si het nid wöue mitgah u het sech der ganz Tag gwehrt. Si het sogar es Brätt us der Wand vo ihrem Zimmer usegschlage, e so dass alli hei chönne miterfolge was der anger mit ihre vorhet. Si het di ganz Zyt nach ihrem Schatz us der Stadt grüeft. Am nächschte Tag isch si doch furt u ig ha se nie meh gseh...Einisch het es Bebe unger üsem Fänster gschroue. Wo mir sy go luege, het mi s'Mamie nümm wöue lah luege. Si hei es meiteli unger üsem Fänschter beschnitte. U das am häll liechte Tag u mit ere total verroschtete Rasierklinge. Es paar Mönet bevor dass mir id Schwytz zrügg sy, het doch d'Polizei eine vo üsne Nachbare mit Handschälle abg'gholt. Dä het es vier Jährigs Meitschi vergwautiget gha...