Der Mäni u ig hei in Douala es Doppubett gha u eis grosses Moskitonetz drüber. Är het's guet gha, di Fyycher hei meistens mi gstoche...Wenn aube wider e Mau eini vo dene Mugge is Netz cho isch, bin ig aube go s'Mamie hole für se z'töte. Es isch wider Mau der Fau gsy, dass mi öppis gweckt het. I bi go s'Mamie hole. Der Papi isch für paar Tag a re Konferänz gsy u isch über Nacht dört blybe. Mir hei no nid so lang dört gwohnt, hei no Holztüüre gha u der Zuuhn ums Huus um isch no nid fertig gsy. Wo mir zrügg i mys Zimmer hei wöue, het's plötzlech bir Hingere Tüüre so knarret. Mir sy nächer häre u hei gseh, dass öpper vo usse mit em ne Brächyse probiert di Tüüre ufz'tue. Mir sy beidi häre u s'Mamie het sech a däm Yse feschtgha u het afa rüefe: Thief, Thief u ig ha pägget: Police, Police. Di Person wo dusse gsy isch het no bau Müeh gha das Brächyse wieder chönne usezzieh, hets doch gschaft u isch dervo...Am nächschte Tag het me Fuessspuure gseh wo zum Nachbar gfüehrt hei...
Der Papi het gly verstärkti Blächtüüre montiert u vo denn aa hei mir e Nachtwächter gha...aber ganz ruhig isch es no nid gsy, morn meh...