Hüt am Morge bin ig mehrheitlech gläge. Zwüschyne han ig gkochet, das machen ig ja geng no gärn...Zum Zmittag sy liebi Fründe, d'Ch. u der R. cho. Kurt u M@i hei vorhär o no ghulfe choche. Es isch fein gsy, i ha sogar zwöi Mau usegnoh: Schwynsbrate mit Sauce, Teigware, Chrutstielgratin, Vierfarbigi Rüebli u s'mitbrachte Dessert us em Oberland.
Am drü hets grad fliegende Wächsu ggäh. Mys Gottemeitschi, scho ne schöni Teenie isch mit ihrem Mami verbycho. Das het mi mega gfröit. I bi uf mym Bett gläge i mym schöne Zimmer. Es sy no paar liebi Telefon u whatsApps cho u am Sächsi han ig's mir lah guet gah. D'R. het mir e wohltueendi Pedikür gmacht und myni Füess no massiert. Das het guet tah! I ha mi nächär no chly vertörlet mi interessante Sändige won ig nachegluegt ha.
I ha no mit der Stationsleiterin vom Stöckli gredt, wo s'Grandmaman wohnt. Si sy am Chrampfe, hei o vom Personal infiszierti u es isch haut scho ne mega Ufwand mit de viele Vorsichtsmassnahme. O di Vollmontur Aalege, Abzieh, Aalege, wieder Abzieh. Bitte, bättet für s'Pflegepersonal i Heim u Spitäler, dass si dä Stress u Druck möge ushalte...
Myni Arme sy geng no blau u tüe mir weh, vor allem bym Picc. Es het e Bläuele ungerem Pflaster u das zieht geng dranne...Bym rächten Arm geit's nidsy...wi uf em Bild...